#هاشتاغ مع سحر صرنا نخاف ندخل في اي طريق جديد

الانباط - سحر الخطاب

صرنا نخاف ندخل في اي طريق جديد، او نفتح اي صفحة جديدة ، نخاف من اي علاقة جديدة لو شو ما كان نوعها ، و من اي مشاعر جديدة ، صرنا نخاف من اي اهتمام بسيط اتجاهنا ، و من اي كلام جديد نسمعه ، صرنا نحاول نعمل حدود مع كل شي ، و كأنه الواحد عايش في غربة ، عم يبعد عن كل الاشياء.. مش لانها مش حلوة .. بس يمكن من خوفه من اي خطوة جديدة ..

صرنا نسامح و نمشي عشان نخلص ، و نسكت عشان زهقنا ، و نضحك عشان ما حدا يشفق علينا او يحكيلنا "مالك" ، 
صرنا لما نشوف تنين ايدهم في ايد بعض نحكي جوانا معقول يكملوا مع بعض من دون ما حدا يترك التاني بنص الطريق ؟

كل شي جوانا عم نتخيله ما بيكمل .. و ما بيستمر ..

احنا ما تغيرنا .. الصورة كل يوم عم تكون اوضح و اوضح في نظرنا .. بس يا ريت نضل دائما مبسوطين و نحاول ما نخاف من اي شي ..

** يا ريت الصورة الي مدفونة جوانا يصير فيها تفاوؤل اكتر ، و تكون أجمل مهما كانت سودة و مظلمة نحاول احنا بإيدنا نضويها و نفرح ببساطتها و تفاصيلها، و الطريق الجديد نجربه عشان ممكن هو الطريق الصح ، و الصفحة الجديدة ممكن تكون البداية المبهجة في حياتنا ..

و ما نفكر بالاشياء الناقصة و الي مش موجودة و الأشياء المفقودة ننساها عشان التفكير فيها رح يرهقنا كتير و ما رح يكون في اي نتيجة..!