#هاشتاغ مع سحر عشان هو بيحب اللون الاسود

الانباط - سحر الخطاب

- عشان هو بيحب اللون الاسود كتير صار كل اواعيها لونهم اسود و كل شي بتشتري اسود عشان هو بيحبه .. مع انها ما بتحبه. 
- و عشان هو ما بيحب يكون عندها صحاب كتير قطعت علاقتها بكل الناس الي بتعرفهم .

- و عشان هو ما بيحب الشعر الطويل ، قصته .
- و عشان هو ما بيحب النقاش كانت تسكت .
- و عشان هو ما بحب الشغل و من دون مبرر ، تركت شغلها .
- و عشان ما بيحب يكون عندها "فيس بوك" لغته . 
- و عشان ما بيحب المسلسلات التركية ، بطلت تتفرج عليها .

** المشكلة احنا بنضل نعيب على الرجل إنه بيغير في البنت . 
بس الحقيقة إنه البنت هي اللي بتقبل التغيير. 
بتدعي إنعدام الحيلة، بس الحقيقة إنه "إختيار" هي رضيت فيه بدون مقاومة او اعتراض او حتى نقاش.

"لو الارتباط صح" رح يغيركم انتو التنين للأفضل. مش لازم تتنازلي عن الاشياء الي بتحبيها و الي هي مصدر سعادتك، مش لازم تكرهي حالك ، مش لازم تتخلي عن نجاحك و طموحك و كيانك ..
حبي و إرضي .. بس مش لازم تمحي شخصيتك و الاشياء المميزة الي فيكي .

وانت مش لازم تفرض سيطرتك.
السيطرة العقلية غالبا دوافعها عدم الثقة.

"التغيير سنة الحياه"، فالأفضل هو أن تنمو مع بعض، تتطوروا مع بعض، تكتشفوا الاشياء مع بعض،

"لو الارتباط صح" ، ثقتكم ببعض رح تلغي الداعي للسيطرة، و اصلا ما رح يكون الها وجود .

و رح تبدلوها بالمودة والسكينة والرحمة.