طريقتي في مكافحة الفساد

 

 

 

 

آآآآآآآآآخ و ألف آآآآآآآآآخ لو يسلموني منصب مكافحة الفساد مع صلاحيات شاملة ....طبعا ما قصدي أسحب البساط من تحت رجلين الباشا سميح بينو ..هو حبيب ألبي ..بس لأنو الباشا يتصرف حسب القانون و إجراءات و روتين ..وتعال وما تيجي ..و خليها لبعدين ..وهلم جرا ..وهاي الشغلة عاملة من مكافحة الفساد أمر بطيء و بطيء جدا..

أنا اللي بدي إياه اشي ثاني ..بدّي أغمض عيني عن القانون اللي يحمي الفاسدين ..و بدي أجيبهم واحد ورا الثاني ..ما إحنا عارفينهم والا قاعدين نتخوث على بعض ...؟؟! و بعد ما أجيبهم أول شيء أعملو بدي أشبع فيهم كفوف و شلاليط ..و بوكسات ..بدي أتدرب عليهم ..بدي أضرب سونجات و مقصات ..بدي أخذ على ظهورهم الحزام الأسود ..خمسة دان ..بدي و بدي ..

إذا ظلينا نستنى في القانون ليجرجرهم رح يضيع ما تبقى من البلد ...هاي الناس أنا بعرفها ..ما بتيجي إلا بالعين الحمرا ..بدي أخليهم يشوفوا النجوم بعز الظهر بشهر سبعة الساعة ثنتين ..بدي ألعن أبو اللي جابهم وأبو اللي ركبهم على اكتافنا ..

القانون قاصر ..و بالنسبة للفاسدين القانون هو حماية لهم ,,لأنهم حرّيفة في فهم القانون .. وعباقرة في صناعة الثغرات ...إذا بدكم تكافحوا الفساد ؛ بس سلموني الدائرة شهرين زمن و أعطوني عشرة من أصحاب القصف العشوائي ؛ إذا ما رجعتلكو فلوس البلد ما يكون اسمي ..... صحيح شو اسمي أنا ..؟؟

بالمشرمحي ..أعطني فاسدا اعطك بلداً خالياً من الفساد ...