إذا رفعوا فاتورة الكهربا ..

 

 

مش عارف كيف رح يعملو الناس بالرفع القادم ..!! معقول تعدّي ..و رح نسمع حدا بيصرخ بأعلى صوته في الشارع : عدّي يا مصدّي ..؟؟ معقول الناس رح تتحمل رفع فاتورة الكهربا ..خصوصاً أن كل شي عم يرتفع و يرتفع إلا راتب الموظفين عم تتسلبط عليه البنوك و الديّانة ..؟

لن أقول مثل كل مرة بأنني أشفق على المواطن .. وأتحسر على وضعه ..ولن أقول هلمّوا يا بني قومي و أنقذوا المواطن ..ولن أقول يا حسرة على أم نصرة ..ولن ألطم ..ولن أشد شعري المتبقي ..و لن أشق هدومي و أمشي في الشارع كسيراً حسيراً .. ولن أضرب أولادي على الطالعة و النازلة و أنزل فيهم بكوس و شلاليط و كفوف ..ولن أفتعل مشكلة مع الحرمة و أقول لها : سدّي نيعك و على بيت أهلك ..ولن أتحركش بأحد من الجيران ..و لن أقف في الشارع و أتقاتل مع ذبّان وجهي ..ولن انفعل أو أصرخ في أحد ..

لن أفعل أي شيء مما ذكر ..لأنني مواطن يحب وطنه ..ويجب أن يقف مع الوطن ..والوقوف مع الوطن هذه الأيام يعني أن توافق على الرفع ..رفع أي شيء ورجلك فوق رقبتك ..وبديش أحكي والكندرة بثمّك لأنو عيب أحكي هيك حكي .. وأنا زلمة ما تطلع منّي العيبة و أنتو عارفيني منيح ..

ارفعوا كما تشاؤون و إننا على رفعكم لصابرون ..!!