الموازنة..يا عيني

 

 

المشرمحي: بالك ليش ما بلّشوا؟؟

الشحّاد: في إيش ؟؟

المشرمحي: في الموازنة

الشحاد:وإنت شو دخلك ؟

المشرمحي:مواطن وحاب يتابع؟

الشحاد: لا أفحمتني والله ..أهلين مواطن

المشرمحي : ليش مش عاجبك ..؟

الشحاد: لا عاجبني ..بس هم مش عاجبهم

المشرمحي :مين اللي مش عاجبهم؟؟؟

الشحاد: اطلع من راسي و خلي غيرك يخش

المشرمحي: والموازنة القاعدة عند اللجنة ؟؟؟

الشحّاد: كيف شكلها ..؟؟

المشرمحي: زي خواتها

الشحّاد: وكيف خواتها ؟؟

المشرمحي: ما إنتَ شفتهن..تتخوث ؟؟

الشحّاد: لأ ..بس زمان ما طلّن

المشرمحي: وشو بدّك بهالطلّة ؟؟

الشحّاد: بدنا نتمصرف

المشرمحي: وحد ماسكك؟؟

الشحّاد: ما كل الأمور مأجلة للموازنة

المشرمحي: وإنت شو دخلك فيها ..؟؟

الشحّاد: كيف .. مش أنا مواطن ..؟؟

المشرمحي: آه ..بس إنت لا موظف ولا تاجر ولا مستثمر ..إنت شحّاد

الشحّاد: هيك جبتها ..أنا شحّاد

المشرمحي: شو يعني ..

الشحّاد: يعني بس تتلحلح مع الموظف والتاجر والمستثمر ..بتنعكس علي ..وعلى إللي يناولوني إيّاه ..

المشرمحي: يعني بالك ..وضعك منيح

الشحّاد: مثل الريح ..ما عدا أكمن شهر ..برد وصقيع

المشرمحي: والحل..؟؟

الشحّاد: الحل تقعدوا الميزانية على أبواب الجوامع ..ورزقها ورزقنا على الله