مع واحد نَذِل

 

 

النّذل : وين مقفي يا المشرمحي .. تعال تأقولك ..؟

المشرمحي : ياعمّي انت بتخوّف .. والوقفة معك ما بتريّح ..

النّذل : لَهْ لَهْ .. يا المشرمحي ما أنا خابر إني عملت فيك اشي ..

المشرمحي : صحيح ما عملت .. بَسْ خايف تعمل ..

النّذل : عليك الله وأمان الله ..

المشرمحي : معناتو بلّشَتْ نذالتك

النّذل : لا تخاف .. أتناذل مع الكل إلاّ معك .. مثلاً .. أنا واقف معك هسّة عارف ليش ..؟

المشرمحي : ليش ..؟

النّذل عشان في واحد صاحب إلي .. تراهن مع واحد على إني ما بقدر أخلّيك توقف معي خمس دقايق ..وهيني واقف معك ..؟

المشرمحي : وَلَكْ بدّك تخسر صاحبك الرهان ..؟

النّذل : عشان أكسب أنا ..

المشرمحي : كيف ..؟

النّذل : اتفقت مع الثاني اني أخسِّر صاحب الرهان وأقاسمه النُّص ..

المشرمحي : قدّيش صارلنا واقفين مع بعض ..؟

النّذل :ثلاث دقايق ..

المشرمحي : طيّبْ السلام عليكم .. بخاطرك

النّذل : مع السلامة .. الله يسهل عليك ..

المشرمحي : أشوفك ما مسكت فيّ عشان تكمِّل الخمس دقايق وتكسب ..

النّذل : عشان في شَغَلة في بالي ..

المشرمحي : ممكن أعرفها ..؟

النّذل : خايف تزعل

المشرمحي : ما راح أزعل .. بَسْ احكيلي وتوكل على الله

النّذل : انت عارف لو أنا حكيتلك .. لأ .. مشان الله ظلي وخلك .. وقعدت أترجاك .. عشان تكمل الدقيقتين اللي ظلن ايش كان صار ..؟

المشرمحي : ايش صار .. مش عارف ..؟

النّذل : كان أعطيتني ظهرك واستعجلت وتركتني .. وخسرت أنا وكسب صاحبي

المشرمحي : طيّبْ ما أنت خسرت ..

النّذل : بالعكس .. لما قلتلك روح ..انت ظلّيت عشان تسأل .. وهي صار إلنا مع بعض نحكي فوق الخمس دقايق .. فأنا كسبت وخسرت صاحبي ..

المشرمحي : ضحكت عليّ .. ماأنذلك .. بَسْ تعرف لازم تعطيني حُصّة .. لولاي ما كسبت ..

النّذل : شو حاب تصير نذل ..؟!

المشرمحي : لا ياخوي ..حدّ الله .. بَسْ بدّي اسألك .. كيف صاحبك وصاحبه بدهم يعرفوا انك وقفت معي أكثر من خمس دقايق .. يعني وين هم .. شايفينا ..

النّذل : لأ مش شايفينا .. بَسْ طول وأنا مش جاي عليهم .. هذا بيعني إني واقف معك ..

المشرمحي : وين قاعدين هما ..؟

النّذل : مش قاعدين .. هم هسة خلصوا من دارك ونظّفوها ..

المشرمحي : كيف يعني ..؟

النّذل : شربتها يا المشرمحي .. وعطّلتك عن دارك .. وسرقوك ..!!